உனக்கு இன்னொரு கவிதை

எழுதப்பட்டு மூடிவைக்கப்பட்டிருந்த எல்லாக் காகிதங்களும்
எரிந்து விடுகின்றன

காற்று மறுக்க முடியாத நிர்ப்பந்தத்துடன்
கரித்துகள்களைக் காவிக் கொண்டு பறக்கிறது.

துயரங்களும் இல்லாமைகளும்
வேதனைகளும் வரலாறும் குசுக்களும் நிரம்பியிருந்த
காகிதங்களின் கரி காற்றோடு பறக்கிறது

ஆஹா..

நிரம்பக் காதலுடன்
முத்து முத்தென அழகான கையெழுத்தில் எழுதப்பட்ட

உன்னுடைய வரிகள் மட்டும் எரிய ஒண்ணாது

ஓரமாகப் போய் ஒதுங்கிக் கொள்கின்றன
நீ நீ யென்ற ஒற்றை எழுத்துக்களால் மின்னியபடி.